ການເຮັດທຸລະກິດເຄືອຂ່າຍເປັນອີກອາຊີບໜຶ່ງທີ່ດີ, ເປັນການໃຊ້ເວລາວ່າງໃຫ້ເກີດປະໂຫຍດ, ບົ່ງບອກຄວາມເປັນຕົວທ່ານ: ດຸໝັ່ນ, ເປັນຄົນທີ່ມີຝັນອັນສວຍງາມ…ແລະທີ່ສຳຄັນຄື: ຢາກຊ່ວຍເຫລືອຄົນຮັກແພງທີ່ຢູ່ອ້ອມຂ້າງໃຫ້ເຫັນໂອກາດທີ່ດີໃນທຸລະກິດເຄືອຂ່າຍ.
ຄວາມຫວັງດີທີ່ຢາກຊ່ວຍເຫລືອໃນທຸລະກິດເຄືອຂ່າຍນີ້ລະມັນໄດ້ເຮັດໃຫ້ພວກເຮົາເຈົ້າຂ້ອຍເຈັບຊ້ຳຫົວໃຈມາຫລາຍຕໍ່ຫລາຍເທື່ອນັບຈຳນວນບໍ່ໄດ້ແລ້ວ(ໜຶ່ງໃນນັ້ນມີຂ້າພະເຈົ້າຢູ່ນຳ). ໃນຄວາມຄິດພວກເຮົາຄື: ໃຫ້ໂອກາດແລະຊ່ວຍເຫລືອຜູ້ຄົນໃຫ້ເຫັນອີກອາຊີບໜຶ່ງທີ່ສາມາດສ້າງອະນາຄົດໃຫ້ສົດໃສໄດ້. ແຕ່ໃນຄວາມຄິດທີ່ຄົນເຮົາໄປແນະນຳລະ? ເຂົາຄິດແບບດຽວກັບພວກເຮົາບໍ່? ແນະນຳໄປແນະນຳມາຫລາຍໆເທື່ອ, ຢ້ານແຕ່ເຂົາຄິດແນວນີ້: ເຂົ້າໃຈວ່າຄິດຮອດຄິດເຖິງກັນຈິ່ງໂທມາຢາມຖາມຂ່າວ, ທີ່ແທ້ກໍ່ຢາກມາຂາຍຂອງໃຫ້, ຢາກມາຊວນເຂົ້າຮ່ວມທຸລະກິດນຳດອກ, ຄັນຊັ້ນຄືຊິບໍ່ໂທມາຫລືມາຫາຮອດເຮືອນດອກ, ຂ້ອຍມີວຽກເຮັດ, ໜ້າທີ່ການງານກໍ່ໝັ້ນຄົງແລ້ວ, ລາຍໄດ້ກໍ່ພໍຢູ່ພໍກິນແລ້ວ, ຂ້ອຍບໍ່ມີເວລາ, ຂ້ອຍບໍ່ສົນໃຈ, ມັນຫລອກລວງຕົ້ມຕຸ໋ນ…ແທນທີ່ເຂົາຈະຄິດວ່າ: ທ່ານເປັນຄົນມີນ້ຳໃຈ, ມີຂ່າວດີໆກໍ່ໂທມາບອກ, ສົ່ງຂ່າວຮອດເຮືອນ; ສຸດທ້າຍ, ຄວາມຫວັງດີຂອງທ່ານກໍ່ຖືກເບິ່ງວ່າເປັນຄວາມຫວັງຮ້າຍຊ້ຳ…ທ່ານລອງຖອດວິນຍານແລ້ວໄປສວມໃສ່ຮ່າງກາຍເຂົາເບິ່ງ, ຫາກເຂົາປະຕິບັດກັບທ່ານເປັນປະຈຳແບບນີ້, ໂທຕິດຕາມຊ່ຳເປັນຄົນພິເສດ VIP ແບບນີ້, ທ່ານຈະມັກບໍ່?, ທ່ານຈະລັງກຽດບໍ່?
ລອງເບິ່ງ 8 ສິ່ງທີ່ທ່ານເຮັດແລ້ວຄົນທັງໂລກກຽດທ່ານ:
1. ໝັ່ນໂທໄປຫາເຂົາເພື່ອເປີດໂອກາດທາງທຸລະກິດ: ໝັ່ນໂທໄປຫາຖາມຂ່າວຄາວສະບາຍດີ, ສຸດທ້າຍກໍ່ໂທໄປຊັກຊວນເປີດໂອກາດທາງທຸລະກິດ, ໂທໄປຊວນວ່າມີໂປຣໂມຊັ່ນໃໝ່, ໂທໄປບອກວ່າວັນນີ້ມີສຳມະນາຂາດບໍ່ໄດ້ສຳຄັນຫລາຍ(ສົງໃສຕ້ອງແມ່ນເລື່ອງເປັນເລື່ອງຕາຍແນ່ນອນ), ໂທໄປຊວນມານັ່ງກິນກາເຟ, ໂທມາຊວນໄປກິນເຂົ້າ…ສຸດທ້າຍແມ່ນຢາກໃຫ້ເຮັດທຸລະກິດນຳ.
ຖ້າຫາກເຂົາມັກ, ເຂົາເຫັນໂອກາດເໝືອນດັ່ງທີ່ທ່ານເຫັນ…ເຂົາຈະສອບຖາມຂໍ້ມູນ, ໂບຊົວ, ຊີດີ, ວັນເວລາສຳມະນາ, ຢູ່ທີ່ໃດ…ກັບທ່ານແລ້ວ.
ຫລືຖ້າຫາກທ່ານແມ່ນຄົນທຳອິດທີ່ມາແນະນຳຂ້າພະເຈົ້າເຮັດທຸລະກິດເຄືອຂ່າຍທ່ານຈະເປັນຄົນໂຊກດີ, ເພາະຂ້າພະເຈົ້າຈະສຶກສາຂໍ້ມູນແລະຄວາມເປັນໄປໄດ້ຂອງບໍລິສັດສູງສຸດປະມານ 1 ອາທິດ, ຫາກມີເງິນກໍ່ຈະສະໝັກນຳເລີຍ.
ທ່ານອາດຈະບໍ່ເຄີຍໄດ້ຟັງຄຳເຫລົ່ານີ້ຈາກປາກເຂົາໂດຍກົງດອກ, ແຕ່ສຳນຽງສຽງເວົ້າມັນຟ້ອງວ່າ: ກະຍັງວ່າບໍ່ເຫັນ, ກະຍັງວ່າບໍ່ມັກ, ກະຍັງວ່າບໍ່ເຮັດ, ກະຍັງວ່າບໍ່ຢາກຮູ້ບໍ່ຢາກເຫັນ…ເຂົາຄົງຈະບໍ່ຕອບຂາດປຸດບາດດຽວໃຫ້ທ່ານຟັງດອກ. ຄໍາເຫລົ່ານີ້ທີ່ທ່ານອາດຈະໄດ້ຟັງເປັນປະຈຳເມື່ອເວລາທີ່ທ່ານໂທໄປຫາເຂົາ: ຂໍຄິດເບິ່ງກ່ອນ, ຂໍຖາມຄອບຄົວເບິ່ງກ່ອນ, ຖາມເພື່ອນ, ຍາດຕິພີ່ນ້ອງເບິ່ງກ່ອນ…ນ້ຳສຽງແບບບໍ່ມີຄວາມກະຕືລືລົ້ນທ່ານກໍ່ຈົ່ງລຶບລາຍຊື່ຂອງເຂົາອອກຈາກລິດສ໌ຂອງທ່ານໄດ້ເລີຍ.
2. ໝັ່ນໃຫ້ຂອງຂວັນເຂົາ: ໃຫ້ໂບຊົວ, ຊີດີ, ບັດເຂົ້າງານສຳມະນາ(ຕ້ອງຊື້)…ນ້ຳໃຈຂອງທ່ານປະເສີດແທ້, ພົບເທື່ອໃດກໍ່ມີຂອງຂວັນມອບໃຫ້ທ່ານ, ພ້ອມກັບຄຳສົ່ງທ້າຍກ່ອນຈາກ: ອ່ານໃຫ້ຈົບ, ເບິ່ງໃຫ້ໄດ້, ມີຄຸນປະໂຫຍດຕ່າງໆນາໆ…ທ່ານເຄີຍເບິ່ງວີຊີດີເປີດໂອກາດທາງທຸລະກິດກັບຜູ້ມຸ່ງຫວັງຂອງທ່ານແລ້ວບໍ່? ຂ້າພະເຈົ້າເຄີຍເບິ່ງແລ້ວ: 3 ແຜ່ນ(ແຕ່ລະແຜ່ນຫລາຍກວ່າ 45 ນາທີ, ທີ່ຖືກຄັດສັນມາເປັນຢ່າງດີແລະເຊື່ອວ່າຫລາຍທ່ານຍັງບໍ່ທັນມີຊ້ຳ), ຮູ້ບໍ່ໃຊ້ເວລາເທົ່າໃດ? ບໍ່ຮອດ 20 ນາທີ. ເຂົາອັດສະລິຍະເຫລືອເກີນທີ່ສາມາດຫຍໍ້ເລື່ອງທີ່ຍາວ 135 ນາທີມາເປັນ 20 ນາທີ. ຫລັງເບິ່ງແລ້ວຂ້າພະເຈົ້າຖາມເຂົາວ່າ: ເຂົ້າໃຈບໍ່? ຕອບ: ເຂົ້າໃຈ…ໂອ໋ມາຍກອດ. ຂ້າພະເຈົ້າໃຊ້ເວລາສຶກສາຫລາຍຫລົບຫລາຍຕ່າວຈິ່ງຄ່ອຍເຂົ້າໃຈ…ຜູ້ມຸ່ງຫວັງຂອງທ່ານກໍ່ອາດເປັນແບບນີ້ລະ.
3. ໝັ່ນຊັກຊວນເຂົາເຂົ້າຮ່ວມທຸລະກິດທຸກຄັ້ງທີ່ພໍ້ໜ້າ: ລົມກັນບໍ່ຮອດ 15 ນາທີ, ທ່ານກໍ່ກ້ຽວມາເປີດໂອກາດທາງທຸລະກິດກັບເຂົາອີກແລ້ວ, ສະແດງໃຫ້ເຂົາເຫັນວ່າມີຫຍັງດີຢູ່ບໍລິສັດນີ້: ແຜນດີ, ບໍລິສັດໝັ້ນຄົງ, ຜະລິດຕະພັນຍອດຢ້ຽມ…ບໍລິສັດອື່ນຍອດແຢ້, ບໍ່ດີເທົ່າ…ເຄີຍຖືກກັບຕົວເອງແລ້ວຢາກບອກວ່າ: ລຳຄານ. ມີເລື່ອງລົມກັນເປັນຮ້ອຍເປັນພັນເປັນຫຍັງຈິ່ງຕ້ອງມາກ້ຽວໃສ່ເລື່ອງນີ້, ຖ້າຈະເຮັດກໍ່ຄົງຈະບໍ່ປ່ອຍເວລາມາຮອດວັນນີ້. ຂໍບອກເລີຍວ່າ: ຫາກທ່ານປະຕິບັດເຊັ່ນນີ້ເປັນປະຈຳ, ພົບໜ້າທ່ານຄັ້ງໜ້າທ່ານຈະບໍ່ເຫັນເງົາເຂົາປະກົດຢູ່ໄກ້ທ່ານ.
4. ໝັ່ນໄປຢ້ຽມຢາມເຂົາຮອດເຮືອນ: ຫາກທ່ານກຳລັງເຮັດວິທີນີ້ຂໍບອກວ່າທ່ານເປັນຄົນດຸໝັ່ນ, ໃຈກ້າ, ມີເປົ້າໝາຍ(ແຕ່ເສຍດາຍທ່ານຍິງບໍ່ຖືກເປົ້າ). ຫາກເປັນຍ້ອນຄວາມຄິດຮອດຄິດເຖິງເຈົ້າຂອງເຮືອນຄົງຈະປຶ້ມໃຈສຸດໆ, ແຕ່ຖ້າຫາກໄປພົບເຂົາເພື່ອຈະຂາຍຂອງ, ເພື່ອຈະພັນຄອມມິດຊັ້ນຈາກເຂົາລະ…ເມື່ອເຂົາເຈົ້າຈັບໄຕ໋ໄດ້ວ່າ: ທ່ານໄປຫາເຂົາເພື່ອຫວັງຜົນປະໂຫຍດ, ເອົາລະບັດນີ້ງານເຂົ້າ…ເຂົາຈະປິດປະຕູບ້ານເມື່ອທ່ານມາຍ່າງມາໄກ້ເຮືອນເຂົາ, ບໍ່ຮັບໂທລະສັບເມື່ອທ່ານໂທເຂົ້າມາ. ເສຍໃຈດ້ວຍ, ທ່ານໄດ້ທຳລາຍມິດໄມຕຣີໃຫ້ແຕກສະຫລາຍລົງອີກແລ້ວ.
5. ຕົວະຜູ້ມຸ່ງຫວັງເຂົ້າຮ່ວມສຳມະນາດ້ວຍຄຳຊັກຊວນທີ່ຜິດໆ: ບອກກັບຜູ້ມຸ່ງຫວັງວ່າມື້ນີ້ມີສຳມະນາໃຫຍ່, ວິທີການສ້າງລາຍໄດ້ແບບທີ່ເຮົາບໍ່ທັນເຄີຍໄດ້ລອງມາກ່ອນ, ລາຍໄດ້ດີນຳອີກ, ມີຜູ້ຊ່ຽວຊານມາບັນຍາຍ, ບໍ່ມີໝູ່ໄປນຳຢາກໃຫ້ໄປເປັນເພື່ອນ, ທຸກຢ່າງຟຣີ…ເມື່ອຜູ້ມຸ່ງຫວັງຖາມມັນກ່ຽວກັບຫຍັງ? ບໍລິສັດຫຍັງ?, ຮູບແບບແນວໃດ?…ເອີ່ໆ…ອ່າໆ…ແລ້ວທ່ານຕອບວ່າບໍ່ຮູ້(ທີ່ແທ້ຫໍ່ຮູ້ເຕັມໃສ້), ຫາກບອກວ່າ: ເຮັດທຸລະກິດເຄືອຂ່າຍ, ເຂົາຄົງຈະບໍ່ຫລິ້ນດ້ວຍຕົວະໄປກ່ອນ. ເລື່ອງອື່ນເອົາໄວ້ຫລັງ.
ຜູ້ມຸ່ງຫວັງ, ເພື່ອນຫລືຄົນຮັກແພງຂອງທ່ານ…ບາງຄົນກໍ່ຢາກໄປ, ບາງຄົນກໍ່ອີ່ຕົນທ່ານຈິ່ງໄປເປັນເພື່ອນໂດຍບໍ່ໄດ້ຄິດຫຍັງ, ເມື່ອໄປຮອດງານປະກົດວ່າທ່ານຮູ້ຈັກຄົນຫລວງຫລາຍໃນງານ, ນັບແຕ່ອັບລາຍນ້ອຍຈົນຮອດອັບລາຍໃຫຍ່, ຊ້ຳບໍ່ໜຳພາໄປແນະນຳອີກ…ຮູ້ໝົດເປືອກທ່ານແລ້ວບາດນີ້, ພາມາເປີດໂອກາດທາງທຸລະກິດນີ້ເອງ. ເປັນທ່ານໆຈະຮູ້ສຶກແນວໃດເມື່ອທ່ານຖືກຕົວະແບບນີ້? ຕອບຊ່ວຍ: ຈະບໍ່ມີເທື່ອໜ້າອີກ…ຊົມເຊີຍທ່ານໄດ້ຂ້າລາຍຊື່ຜູ້ມຸ່ງຫວັງອອກຈາກລິດສ໌ຂອງທ່ານໄປອີກແລ້ວ 1 ຄົນ.
6. ໃຫ້ເຂົາເປັນຂົວຕໍ່ໃຫ້ທ່ານຮູ້ຈັກກັບຄົນອື່ນ: ນໍາສະເໜີໂອກາດທາງທຸລະກິດຕໍ່ເຂົາແລ້ວຍັງບໍ່ພໍ, ທ່ານຍັງໃຈດີຢາກຈະນຳສະເໜີຕໍ່ຄົນຮູ້ຈັກຂອງເຂົາອີກ. ເຮັດວິທີໃດລະ? ຊວນເຂົາເຂົ້າຮ່ວມປະຊຸມຫລືສຳມະນາຕິລະ, ໂດຍຝາກທ້າຍຕື່ມອີກວ່າ: ຢ່າລືມຊວນຄົນທີ່ຮູ້ຈັກເຂົ້າຮ່ວມງານນຳຈັກ 3, 4 ຄົນ. ຍິງປຶນລູກດຽວໄດ້ນົກ 3, 4 ຕົວພ້ອມກັນ, ປະເສີດແທ້, ບໍ່ໄດ້ເອື້ອຍຊິເອົານ້ອງແທນຄືໂບຮານເພີ່ນກ່າວຕົ໋ວນີ້. ຜູ້ມຸ່ງຫວັງຄົງຈະຍັງຄົງຄວາມສັດທາໃນຕົວທ່ານອີກຫລືບໍ່? ຢ້ານແຕ່ເຂົາຄິດວ່າໂລບມາກຕິລະ !!!
7. ເວົ້າເກີນຄວາມຈິງເລື່ອງລາຍໄດ້: ເຮັດວຽກບໍ່ຮອດ 2 ເດືອນລາຍໄດ້ກວ່າ 25 ລ້ານກີບ, ເຮັດ 3 ເດືອນກວ່າ 40 ລ້ານກີບ…ຢູ່ຕ່າງປະເທດອາດຈະໄດ້ແທ້ຫລືກາຍກວ່ານັ້ນ, ແຕ່ຢູ່ປະເທດເຮົາຂ້ອນຂ້າງຍາກເຕີບຢູ່ໃດ. ຖ້າໄດ້ແທ້ພໍ່ແມ່, ອ້າຍນ້ອງ, ຍາດຕິພີ່ນ້ອງ…ເຮັດນຳຫລືຍັງ? ເຂົາຈະເປັນຄົນຮູ້ກ່ອນທີ່ຂ່າວຈະຕົກມາເຖິງພວກເຮົາອີກແມ່ນບໍ່? ເປັນຫຍັງຈິ່ງບໍ່ພ້ອມພຽງຮຽງໜ້າກັນເຮັດລະ?…ຫລືມັນເປັນຄຳເວົ້າທີ່ເກີນຄວາມຈິງເທົ່ານັ້ນ. ຄວາມຈິງມັນກໍ່ຄືຄວາມຈິງ. ແຕ່ແນ່ນອນລະ, ຫາກເຮັດຈິງຈັງລາຍໄດ້ທີ່ໄດ້ຮັບອາດຫລາຍກວ່າເງິນເດືອນປະຈຳ, ແຕ່ເປັນຫຍັງລະເວລາຂຶ້ນແຊປະສົບການລາຍໄດ້ຈິ່ງເພີ່ມເປັນ 2, 3 ເທົ່າ…
8. ໝັ່ນສະແປມເມວ: ເປີດອີເມວຂຶ້ນມາເທື່ອໃດທ່ານກໍ່ບໍ່ລືມທີ່ຈະສົ່ງອີເມວ, ສົ່ງ Code ທີ່ທາງທີມງານຕັ້ງໃຫ້ໄປໃຫ້ກັບຄົນທີ່ຢູ່ໃນລິດສ໌ອີເມວຂອງທ່ານ, ສົ່ງໄປຕະຫລອດແຕ່ຜູ້ຮັບກໍ່ບໍ່ເຄີຍເປີດເບິ່ງຕະຫລອດ. ສະແປມເມວແມ່ນການສົ່ງຂ່າວສານ, ຂໍ້ຄວາມ…ໂດຍທີ່ບໍ່ໄດ້ຮັບການຍິນຍອມຫລືອະນຸຍາດຈາກເຂົາກ່ອນ, ບໍ່ໄດ້ເປັນສະມາຊິກຂອງເຮົາ, ເປັນການລົບກວນຄວາມເປັນສ່ວນຕົວອີກຢ່າງໜຶ່ງ. ບາງປະເທດອອກກົດໝາຍຫ້າມແລ້ວ: ຜູ້ໃດລະເມີດຄວາມເປັນສ່ວນຕົວໂດຍການສະແປມເມວມີໂທດ.
ເຫັນຢ່າງນີ້ແລ້ວ, ເພື່ອນໆກໍ່ຈົ່ງເຮັດໃຫ້ມັນສົມມາພາຄວນ, ຮັກສາໄລຍະຫ່າງແມ່ນເປັນການດີທີ່ສຸດ, ເຂົ້າໃຈທຸກຄົນທີ່ສະໝັກເຂົ້າມາແລ້ວກໍ່ຢາກເຮັດໃຫ້ເຕັມທີ່, ຢາກກ້າວຂຶ້ນໂພດຽມ, ຢາກເປັນໜຶ່ງໃນລ້ານ…ແຕ່ເຮົາຢ່າເຮັດໃຫ້ການເຮັດທຸລະກິດເຄືອຂ່າຍທຳລາຍໄມຕຣີອັນດີງາມຂອງທ່ານກັບຄົນທີ່ທ່ານຮູ້ຈັກໄປ, ເພາະມັນອາດຈະບໍ່ກັບຄືນດັ່ງເກົ່າໄດ້ອີກ. ອ່ານຈົບບົດນີ້ແລ້ວ, ຂໍໃຫ້ທ່ານຈົ່ງປະສົບຜົນສຳເລັດ, ສຸຂະພາບແຂງແຮງ.
ຂຽນບົດຄວາມຮ່ວມກັນ, ແນະນຳໃຫ້ໃຜກໍຕາມທີ່ຢາກມີທຸລະກິດເປັນຂອງຕົວເອງໃຫ້ເລີ່ມດ້ວຍການເຮັດ Network Marketing ໃນຫນັງສື Why We Want You To Be Richແລະ Why We Recommend Network Marketing
1. ຂ້ອຍຢາກຈະຢຸດເຮັດວຽກເສຍທີ.
